|
Cu sapi
quanti pitturi hanu fattu quatri,
e pueti puisii,
turisti futugrafii,
scappisannu petri
ca parrunu 'i storia.
Cu sapi
quanti maistri 'i musica
hanu fattu 'nnammurari
ccu canzuni ca parrunu 'i tia.
Petri antichi, auti 'nto' celu,
mari c'arrusbigghia sentimenti
arvuli c'abbrazzanu 'i me' peni
e munti ca fanu curuna
a tia tiatru di natura.
'U suli abbrucia 'u ciatu 'nto' cori,
macari ju ti vogghiu dunari'
'i me' mumenti, 'i me' scanti, 'i me' silenzi.
Dunami 'i to' vrazza
E stringimi forti,
vogghiu sentiri 'u ciauru 'i sta terra
stritta 'o me' cori. |
