Buccheri
Author: Settimo Martorano
|

ELENCO POESIE


Dintra ‘na naca fusti misa ‘n mbrazza,
‘u friscu dô Pisanu t’accarizza,
‘a pampina ‘u Mastreddhu ti la sguazza,
e di la Chiana resti la biddhizza,
Mungibeddhu di luntanu ti talia
Munti Lauru ti fa ‘na puisia.

Ascumminasti la me fantasia
virenniti cueta arripusari,
pi ttia ‘a cantu chista miludia,
quannu ‘u tô çiuri sugnu a ciaurari
e tu, Buccheri, dormi e t’arriposi
cô çiauru ca senti di li rosi.

Cu è ca ti stampau chissu vosi,
ti stinnicchiau ‘n menzu la friscura,
tutti li tò ducizzi l’arricosi,
ca ti lassau a bona cugnintura,
mentri t’annaculii si a ssunnari
pari ca dormi e ssi mis’ ‘a vulari.

Forti vi lu cantu a tutti pari,
amici ca a mia stati ascutannu,
i stiddhi ‘n celu sunu a lucicari,
li tò biddhizzi a tutti i vai mustrannu,
si misu tra Pisanu e lu Mastreddhu
cu li stratuzzi toi fatti a vureddhu.