|
Smacciati i
tirrina, a lu maisi
cu aratu c’affunnava
la massa nna la terra iarsa.
Passi lienti ri voi a li cirenni
vurricavunu simenti,
eriva cresciuta e nna quarara
latti genuinu ca uddia,
ricotta aruci e lu gran frummagghi…
Nna lu mmiernu senza pipitiari,
calata a catina zzappuliannu
u lavuri e li vurazza stanchi
senz’aviri anticcia ri rrizziettu.
Ngranavunu i spichi nna la stati,
fauci nne manu e li canneddi,
u suli m’affarava nta iurnata,
ddu coccia r’aulivi e ppani…
Na vivutedda ri vinu
e mitia finu ca u suli
nno cielu scunciennu tracuddava.
Nta l’aria co cauru a pisari,
a sira mpiattu ri minescia,
sunnava li regni straviati
e la imenta pistannu ca naschiava.
Ora li ma figgi risgrazziati
s’hanu sbinnutu pi na bagattella
lu tirrinu e si sballaccunianu
nno giru ri siei misi li rinari!
Povera matri dda o cimiteru…
quantu sacrifici mischinazza!
Fu idda ca vi fici sturiari
faciennumi vinniri i vistioli…
Sturiu ‘n nni mangiastru, nne mistieri…
E ora chista casa nun si vinni!
Nun miettu firma e sulu a morti mia
Faciti chiddu ca vi pari e piaci. |
