|
Ma unni
scappi? Unni vai?
Tutti li venerdì arrivati i dui
Lassi l’ufficiu comu nu furettu
pi ghiratinni ‘nta ‘n paisi i nenti
ammucciatu ‘n menzu a li muntagni!
Chissu m’addumannò na me collega
iunti all’ultimu jornu ra simana
taliannumi comu na bestia rara
cu ‘n mistu ri cumpatimentu e ‘nviria.
Ma chi nni sapi idda ‘i cosa attrovu.....
Arbiri pi curuna... nu paisi
unni li ririnedda a primavera
trovanu i niri fatti all’annu prima,
a negghia di l’invernu, u ciauru ra ligna
ca araciu araciu s’adduma ‘nte camini,
lu friscu di l’astate, i siratini passati
cull’amici a cianciari a li canali,
i tempurali doppo u menzu agostu
li rannuli e lu suli ca li scugna....
A paci e a serenità, ca doppu na simana di
travagghiu,
mi runa u ciatu pi ricuminciari
a curriri e firriari ‘nta città.
E a genti.... ca nun canusci, ma ca ti saluta,
comu su forra tutta amica to,
e ti fa sentiri ‘n famigghia macari si si sula!
Chista è Buccheri, cara a me collega.....
si nun ci criri veni e viri tu...
poi t’annamuri comi successi a mia
e a tanti e tanti amici ca su ca. |
