|
Comu n’aneddu
persu
‘mmenzu a rina du mari,
cuntannu notti e iorna
io ti circai anima mia
Patennu siti e fami,
scavai la terra
cu li me mani
di sangu arrussicati.
Ma nun t’attruvai
Senza darimi paci
circannu la to luci
scinniu ‘nfunnu o mari
natannu dispiratu
pinsannu d’affucari.
Ma nun t’attruvai
Allura mi persi pe strati
A ogni paisi mi fermai,
taliannu rintra e case,
d’arreri a ogni finestra.
Ma nun t’attruvai
Poi stancu e senza ciatu
dopu tant’anni di fatica
m’arricurdai ro me paisi,
Sutta u suli abbannunatu
E ci turnai
Eri assittata cu na vesti ianca
vicinu a porta da me casa
quannu co iorno arrivai
Eri china di luci.
Eri unni nun t’avia circata mai |
