|
A miseria e a puvirtà ni supraniava
ci n’era assai ma era onesta.
N’te casi nun c’era spiragghiu i luci ca trasia,
sulu u llustru i luna ca bbattia ’nti na povira tannura.
U friddu ca s’anfilava de filazzi
annava rittu e trasia n’ta canniedda i l’ossi,
u luci da conca cauriava sulu i pieri
e ’nti l’anchi ti spuntaunu i iattareddi.
A fini dill’anni 50 u pani era duru e poviru
pi cumpanaggiou c’era n’fiancottu di tristizza.
Travàgghiu nun ci n’era, picchissu di Bucchieri
partiunu pa Svizzira. e lasciaunu carusi e li mugghieri.
Sparagnaunu occa lira p’accattari na viliggia i cartuni,
ci mittiunu na para i causi, n’cappottu cu l’avia,
dui o tri pari i cuasetti e du cammici di cuttuni
e n’to menzu u cuori fittu ca era chinu di duluri.
l’attaccaunu cu na corda p’amuri di tiniri,
pi suppurtari u viaggiu, loncu e chinu i strapazzu.
Cu l’uocchi persi ’nto vacanti de pensieri, e Canali
pigghiaunu l’autabbussu e s’assittaunu d’arrieri.
I carusitti che causi curti e i faccitti nichi nichi,
salutaunu cu n’fazzulettu, u lasciaunu sbintuliari,
taliaunu i mammi o i patri ca annaunu luntanu
e a lacrima ca scinnia. s’asciuavunu ca manu.
Avia tri carrozzi u trenu i Sarausa pi Milanu,
i sedili erunu scommiti, vecchi e fatti i lignu
e a ggenti, pi chianari viliggi e sporti, si daunu na
manu
e i benistanti diciunu: Menu mali ca iù nun ci signu.
Doppu n’gniornu e menzu arrivava a Zuricu
e ’nta stazioni fridda asspittallu c’era n’amicu.
U travagghiu era pronti, ma nun capia nenti.
na lincua troppu dura, s’avia stari sempri attenti.
Tutti i siri sulu, ’nti n’arcovia ’nta bbarracca
manciava pasta asciutta o si facia na minestra.
Pi cumpagnia vicinu, c’era na stadda china i vacchi
e primma di curcarisi taliava sempri da finestra.
Pinzava! Cusà ! Occarunu vieni
pi purtarimi i saluti di Bucchieri,.
na lampatinitta a lasciava addumata
pa’ lluciari a strata, ca era china i nivi n’cupunata.
U mmernu era loncu e friddu, e qu’ annava pieri pieri !
Avaragnava u pani, ma cuori e u pinzieru l’avia a
Bucchieri.
Francesco Mazza
|
