|
batti ’nta finestra do curtigghiu
ti taliu, nun ti viru, ma ti sentu.
M’incutugnu commu fossi ’npicciriddu
e auolu cu ttia cu tuttu u sintimentu.
Giri e ti sbatti facennu fuddittu
e l’arma do cuori ,tu mi fai autari,
pirchì ti ggiri e chiani rittu rittu
e mi fai capiri ca nun m’ascantari.
’Nti ll’aria mi porti n’menzu a sti campagni
e viru tutta a ggenti ca simina.
Viddani senza terra e u cuori ranni
cu tanta paci e a menti sirina.
Sè sì liggieru e sciuri ci dai carizzi
e sposti tuttu u sciauru ca fanu.
Sè sciussci forti allura i strapazzi
e i lasci commu n’ommu senza manu.
U viddanu ca fà maisi e ci simina,
spera sempri e primmi i lugliu di pisari,
allura ci’à sciussciari ventu i marina
’nti ll’aria, co u frummentu iddu à spagghiari.
Se Diu ti desi forza pi natura,
tu a chista ggenti u sai ! L’aiutari.
Sè nun c’ è nuddu ca ci presta cura
ci resta sulu a pagghia pi manciari.
A mmia mi porti unnè ca mi pigghiasti
e ’nto curtigghiu queti dda finestra,
fà addivintari ulivi tutti st’agghiastri
e bbaci e mammi ca, fanu na minestra.
Iù signu prontu e vaiu assi luntanu
e cercu i fari bbeni strati strati,
c’ è ggenti c’ abbisognu di na manu
‘ nti sta terra assai sunu frustrati.
CiccioMazza
|
