|
Mi piaci ddù
vinticeddu primaverili
ca m’accarizza ‘a facci e scumpigghia li capiddi.
‘U ventu mi piaci e m’angustìa,
nda jurnata può essiri friscusu, sciruccusu o
ruvittusu.
Fa cuccàri l’erba n’de tirrina
Fa annacàri l’arbiri e li strangulìa
Fa spagghiari ‘u frumentu n’da l’aja,
Fa divintari u mari burrascusu,
assicuta i nuvuli n’do celu.
‘U ventu è l’unica cosa libira,
passa di unni voli, trasi dintra li casi
e ti scumponi: ccà sugnu!!!
‘U suli no! ‘U suli dintra nun può
trasiri: anche l’acqua ca chiovi
diventa prigiunera quannu tocca
‘a terra; veni asciugata o sfugata
n’do mari o n’da ciumara o ricugghiuta.
‘U ventu no! ‘U ventu è libiru, duci o
sarbaggiu, fa comu voli iddu:
‘U lassi fora da casa?.... Fa
mulineddu, sbatti porti e finestri,
trasi di ogni purtusu di ogni çiaccazza,
frisca e murmurìa o munnu ‘u so lamentu
di guerra.
Nuddu e nissunu ‘u può firmari:
Picchissu si dici “libiru cumu ‘u ventu”. |
