Lu francisi cu
la sò putenza
‘n Sicilia facìa malacrianza
Lu pani ni livava dì la menza
Francisi si viriun’ a ogni stanza
Iddi fidannu nì la so putenza
E nui, mischini, suttu la so lanza
Ma ‘nda n’ura fu distrutta ddà simenza
Fu ppì tunnina salata la Francia
Na vuci ppì li strati ca gridava
“nun lu sintiti lu Vespuru ca sona”?
e ognirunu l’arma si pigghiava
e contro lu francisi niscìa fora
Tuttu lu populu vinnitta gridava
puru li donni vonnu fari prova
Sicilia ca porti la Cruna Riali
nà ssa to testa: mancu ci cummieni!
Cà sì chiù ricca di lu stissu mari
E li tò figghi su tutti guerrieri
Se qualchidunu c’avissi a cumannari
Passassi sutta!… se curaggiu tieni
Sicilia Sicilia, nun dubitari
Nuddu ti metterà sutt’a li pieri
Senti la Francia ca sona a martuoriu
No! Ca la Francia nun vieni chiù in Sicilia
Viva Sicilia ca porta Vittoria
Viva Palermu ca fici mirabilìa
Sunati tutti li campani a gloria
Spinciti tutti l’armi a tirribilìu
‘cà ppì l’eternu resterà a mimoria
ca li francisi ristanu ‘n Sicilia
Di Nonna Vita
Poesia in ricordo degli anni di scuola, ovvero
nel 1940 |