|
Vulissi
trasiri ri notti, anima mia,
dintra a to casa mentri tu dormi,
e senza fari scrusciu
vicinu o to lettu ‘nginucchiarimi
pi vigghiariti mutu.
Ora ca dormi e nun mi viri
sentiri i to suspiri e cuntarli a unu a unu
mentre u me cori chianci lacrimi di vitru
chini di maravigghia.
Tutta a nuttata accussì
vulissi stari,
pi nesciri poi cunsumatu
e in silenziu lassariti ca dormi,
prima ca u suli vasa i to capiddi
E tu , anima bedda e sula,
nun t'addunerai di nenti.
Sulu ‘npinseri sugnatu t’arresterà di mia
quannu rapi i to occhi
‘m menzu a la luci ro iornu ca s’affaccia
dintra i to stanzi chiusi |
