U FUCUNI
Author: Concetta Cassarino

ELENCO POESIE

'Nu vecchiu fucuni arruggiatu
veni iettatu o bordu da via.
Nun servi cchiù comu 'na vota,
quannu riscaddavi i panni e l'ossa e
ppi stari allegri e in cumpagnia
si cuntavunu storie invitanti
e i picciriddi scantati virevunu
fantasmi vulari via.

Truncuni, fraschi di ligna virdi
riempivunu di fumu i naschi
di tutta 'a famigghia ca doppu 'na
jurnata accantu 'o caru patri si riunia.
Ora nun c'è cchiù bisognu di tia;
a sira quannu a genti turna a casa
si ietta 'nu divaneddu,
ammacca 'nu pulsanti e si cauria.