TERRA, MATRUZZA MIA
Author: Natalina Marina

ELENCO POESIE

Sta terra mia
è na bedda canzuni r’amuri
E a tia la vuogghiu rialari
Ca ri lu me cori
Si a ciù ranni passiuni
Triunfu ri culura
intinti supra na tila cancianti
Ca sulu nu cori r’amanti
sa leggiri e capiri
Si fussitu ciuri,
terra mia,
iu ti vulissi sulu taliari
E nta lu to pettu,
comu na picciridduzza
addurmintarimi.
Accuntintarimi
ri li to vrazza
di zagara d’oru
ca rintra serbunu
na ninna nanna antica.