FRIDDU N'TA LU CORI
Author: Salvatrice Motta

ELENCO POESIE

Quannu senti friddu n’ta lu cori
nun è lu ‘nvernu ca si fa sentiri
nun è la nivi ca lenta lenta scinni
e si fa acqua n’ta li vini
nun è lu ventu di la tramuntana
ca jela u sangu di la vita
nun è lu scuru di la notti
c’abbrazza l’omu sulitariu.
Quannu senti friddu n’ta lu cori
é picchì lu suli di l’amuri
s’ammuccia ddarreri
a nuvuli di chiantu e timpesti di duluri
e nun c’è paci pi st’afflittu cori.