|
Hanu vinutu
prestu stamattina,
quasi pri nun fàrisi addunari …
Ma o’ primu cuoppu ‘i serra arrisautai,
ca mi parsi ‘na risata ‘i varcacarni! …
-Chi c’è? Chi fu? … Currii a m’affacciari:
visti pi prima la mè carcarazza,
ch’havia lu nidu a la punta d’’o pinu,
scappari jttannu vuci dispirata.
Appoi visti la gru, visti l’opirai:
-Pirchì ‘i tagghiati? Chi ssiti spustati?
‘Na vita lu mè suonnu hanu vardatu!
L’appartamentu ppi iddi cca accattai! …
-Sunu piriculusi! … ‘Nterrimotu
o ‘n ciusciu d’uraganu ‘i po stuccari
e viautri ‘u ddannu fattu àta a pajiari! …
-Lassati almenu chistu: è tantu drittu! …
E havi ‘i nida ‘ i l’ultimi acidduzzi!…
Suddu ‘u jittati ‘n terra, uni hanu a jiri?
-E’ propriu chissà ‘u cchiù piriculusu!
Si abbocca, ‘u condominiu si trascina
E si ‘n muortu ci scappa, chi cantari
Aviti a’ liggi!
Accussì dìssinu ‘i pumperi
c’’a diffida hanu fattu avanti ajeri!…
E’ Virdi, ora, ci lu vaju a cantari
E a cu’ pruteggi l’eculuggia!
-Ci lu jissi a cantari a cu’ voli…
Niautri tagghiamu e pri giunta àti a pajari!…
E si vutanu maladucatamenti,
in tredici lassànnumi a taliari…
Quannu, a menz’jiornu, m’arricosi d’’a scola,
tutti saliati a terra visti li pini,
tagghiati rama a rama, accatastati:
mi parsi Capurettu e li so’ Alpini
pi terra stisi muorti, ammunziddati.
-Vidissi, ora, chi luci dintra havi?
(mi salutau lu capucondominiu)
Chi visuali?… Tagliassi in funnu: ‘u mari!…
Veru è! Ci sta cchiù lustru, visuali e ‘u mari;
ma ‘nt’’o cori ‘na nìula scinnìu,
càrrica di riuordi e di tristizza,
ca nuddu mai saprà arrischiarari,
pirchì, ora, “Pinita senza pini”
s’havi a chiamari unni àbbitu ju!…
|
