|
Addummisciutu ppi sempri nto misteru do' tempu,
si vulcanu astutatu ma chinu d'incantu,
iautu munti do' suddest di Sicilia,
arriali a li genti 'n panurama c'ammalia.
Si accussì anticu ca pari nu nannu,
comu nu vecchiu nun sai fari chiù dannu,
'ntra li to' vrazza teni Buccheri,
e cunti li stori di oggi e d'aieri.
Li ciumi ca di tia scurrunu cuieti,
Vita portanu 'ntra li cavi i l'Iblei
e cantanu canzuna di storia e natura,
a cu iè ca do'jornu nun teni primura.
Di la dea Hybla si altari versu u cielu,
e addispenzi grazzia, vrità e misteru,
s'ammuccia l'Anapu e si svela l'Irminiu
e lu San leonardu trova duminiu.
Nivi s'acconca 'ntra li to' chiani sempri virdi,
unni jocanu d'invernu granni e picciriddi
e duni arrifriscu nto menzu d'a 'stati
quannu lu cauru duna mazzati.
E supra i tia nu gheppiu vola e nu cunigghiu
scappa,
la pecura addimura e lu pasturi fa a ricotta,
botti e joch'i focu ppi la festa medievali,
figghi toi Nannu Lauru ppi mustrari quantu vali.
|
