|
A me Sicilia bedda,
na terra ca cancia cientu culura:
Virdi, giallu, russu, blu e aranciu.
U vientu la carizza tutti i jorna
speci ‘nta li parti ri lu mari.
Mentri a parti ri muntagna,
‘nta la punta propria,
La tumpulia bona pi bona.
Cruvacchi e pigghiajaddini
‘n menzu a l’aria ci sguazzinu filici.
E nui, ri picciriddi, iucaumu cu li furrioli,
taliannu u ventu ri unni minava
e comu li facia furriari.
Oggi a jucari sunu i ranni,
isannu iauti pali cu li strisci russi,
li viri ri luntanu girari pianu pianu.
E l'autra ieri passannu ri vicinu
'nto paisi ri lu scritturi ron Giuvanni,
mi li visti ri ravanti tisi tisi:
tanti furrioli ranni ranni! |
