|
Sutta ‘n cielu
pittatu di blù
putenti e maistusa cumpari.
Tu Riggina nivura ca cianuri
di suffuru e i jnestri frischi.
U suli ti vasa e t’ammanti di luci.
A vucca coluri di la purpura ‘nfucata
trimannu jetta lava ardenti.
Ciumi di focu scurrunu ‘ntra li funni vadduni
bruciannu arvuri di pinu, castagni e nuci.
Quannu a luna si vesti di jancu
i stiddi ti stannu a taliari ;
i cristiani macari: c’è cu vigghia,
cu si maravigghia.
cu passa li notti ‘nsonni cu lu rusariu ‘nmanu.
Mungibeddu nun n’angustiari,
semu figgi tò nun ti lu scurdari.
|
