|
S'affaccia la
matina u suli e rriri
nna stu triangulu ri terra,
unni supra li costi
cini ri satareddi lapuzzi
sucunu cuntenti zzuccuru
re ciuri ca rintra li virischi
abbunnanti sanu di gran meli.
Li carrubbi parunu giganti
a li scuscisi e macci
iauti r'aulivi nta la ciana
fanu beddu uogghiu e i miennuli
ammiscati e cosaruci
ca t'allicchi l'ugna di li manu.
E i pira,i cutugna e ficupali
cu ddi facci rrussi e gialli,
i ficu i tanti qualitati
lu beddu frummientu
purtatu nne mulina a macinari......
cuddusa scia ra mola la farina!
Li macci ri murtidda nne vadduna
vicinu e ciuma e i ddurba,
li cerci, u saliciu,li funtani
cu dda frisca iacqua e genuina!
Ora rriddutti i terri a la frasciami
cu macci nsarbagghiuti
mangiunu u latinu e nuddu i cura.
Poviri campagnuoli,
se turnassunu ' n vita
quantu lacrimi ncuttuti
senza armari nna li ciusi
E vommica fuocu ri rrabbia
Muncipieddu e bruciunu i campagni,
la natura si scutta a vemcia,
tuttu si perdi e nfracirisciunu
nterra partuvalla e limiuna,
u frummientu ca veni ri luntanu.......
e a ura re elezioni vutamu,
ma nun cangia u sistema
e gghiemu avanti a forza i sissignura. |
