|
O macchia di murtiddha, si’ spiciusa!
Si’ tantu beddha ddhocu unni si’ misa;
la pampineddha to’ è ummirusa,
di virdi scuru è la tò cammisa.
Li frutti toi su’ boni 'i manciari
e a tutti li pueti fai cantari.
Lu ciuri èni jiancu e prufumatu;
quannu ti visti mi ni 'nnamurai,
pi taliariti megghiu m’haiu firmatu,
ca vegnu di luntanu, e tu lu sai…
Ti chiantau la massara o’ cantu a’ via
e d’ 'a finestra sempri ti talia.
Si la lapuzza si ferma a manciari,
si ni va sulu quannu si sazìa;
iddha pi sempri si vulissi stari,
pirchì troppu, a manciari, s’arricria.
Iu ti taliu e arrestu incantatu,
pirchì di tia iu sugnu 'nnamuratu! |
