|
Filagni d’azzalori
‘lligazzati
parinu nta lu celu tuttu azzòlu,
sti sfilazzati nuvuli russigni!
E, ‘ncunculati, assai laschi misi,
‘n-cim’a li poja tutti ‘ncucucciati,
di mennuli di ciuri ‘ncurunati
chi mmiscanu russìa ccu iancuri,
‘n-capu tremuli stagghjari li vidu!
Nta la vaddata, po’, stu ciumi duci,
scropi chi scurri grattigghjannu l’erva,
chi granci ‘mmuccia, cu ‘nciddi, cu troti,
suvrastannu crafocchi ‘llarigati,
nta lu so lettu, unni su’ cuticchia,
chi l’acqua liscia, e ‘rridduci lustri!
E l’abbìti, li pigni, li cipressi,
chi ‘n-capu li pinnini su’ ‘nchiuvati,
di li muntagli mis’a tagghju d’iddu,
‘rrègginu balatuna ‘bbianchiati,
chi ntra d’iddi si vasanu ‘ccustati,
comu li picciutteddi chi su’ zziti,
quannu l’amuri, chi lu cori ‘nciamma,
comu palummi fa tuturiari,
siddu lu tempu jùnci di la cuva! |
