‘A Staciuni a Bucchieri
Author: Angelo Ciurcina
 

ELENCO POESIE

L’aria iè ferma, ca pari ‘nchiuvata.
I ciaramini bianchi, mattuni di furnu arsu.
A genti nunn’à a valia di baragghiari.
Assittata nne pizzi de cantunieri
ppi ‘nciatu di ventu
ca scappa do Chian’e Canali.
I vitri da Badia fanu a vava
e finestri da Lifisa
ca spicchialinu,
comm’e cachiladduci da Chianotta,
nne notti strapuntati.
Picca dura, ma pisa.
Paisi friscu, abbiatu o spruvulìu,
unni i vuci currunu, commu o ventu
nne cunnutti do Castieddu.
Ma u ventu, iè ventu
e si perdi ppi Osu o a Friscalìa
E i vuci sunu minzogni
e fanu purtusi.