|
‘Nu giuvinazzu
finu e allampanatu,
ancura senza varba, ampiluccatu,
nisciutu do’ colleggiu appena appena,
jucava o’ palluni cull’amici
‘nto chianu ‘i Sant’Arìàntalena,
‘nveci di cacciari…li pirnici.
Di botta, ‘nta strata ‘e supra, viri passari
‘na facci d’ànciulu cu’ capiddi d’oru.
Na luci forti ‘a lluminava, era ‘n tesoru,
‘na statua ca non si po’ mmaginari.
E cchi fu? ‘N fùrmini?! ‘N lampu?!
Assimpricà tuttu, ‘u cuori si firmà,
non ci capì cchiù nenti, non ci fu scampu,
niègghia fitta: S’ANNAMURA’!
Di tannu non circà cchiù a nuddu,
nè vosi abbagnari ‘u piricuddu.
.
Dda luci forti oggi a viri ancura,
‘nta stissa facci di la so’ signura.
comu ‘na nìula, ‘na cosa astratta.
E dopu tant’anni pensa: ca fossi a cataratta? |
